Skoðað: 16
Santorini er endurhönnuð útgáfa af abstrakt útgáfu spilsins frá 2004. Frá því spilið varð til í höfði Gordon Hamilton fyrir meira en 30 árum hefur hann haldið áfram að þróa, hanna og fínpússa spilið.
Santorini er aðgengilegt kænskuspil, nógu einfalt fyrir grunnskólanema en með dýpt og innihald sem hentar kunnáttufólki í borðspilum. Reglurnar eru einfaldar. Spilið byggist upp af tveimur þrepum:
- Hreyfa – hreyfðu einn karlanna þinna yfir á næsta reit. Þú mátt hreyfa þá á sömu hæð, upp eina hæð, eða niður eins margar hæðir og þú vilt.
- Byggja – byggðu byggingu við hlið karlsins sem þú hreyfðir. Þegar bygging er sett ofan á þriðju hæð er hvelfing sett á hana, sem útilokar þann reit frá spilinu.
Spilinu lýkur þegar einhver hefur komið karli á þriðju hæð og unnið spilið þar með.
Mismunandi guðlegir kraftar – Í Santorini er hægt að bæta yfirnáttúrulegum kröftum í spilið, með 40 guðum og hetjum sem breyta því alveg hvernig spilið spilast.
VERÐLAUN OG VIÐURKENNINGAR
- 2018 SXSW Tabletop Game of the Year – Tilnefning
- 2018 Spiel des Jahres – Meðmæli
- 2018 Origins Awards Best Board Game – Tilnefning
- 2017 International Gamers Award – General Strategy: Tveggja leikmanna tilnefning
Sigurður Jón –
Ég ætla ekkert að draga neitt úr því, ég elska Santorini! Spilið er glæsilegt á stofuborðinu.
Insta klassík ef ég má sletta.
umferðir eru leiftursnöggar og það er mjög lítill biðtíma á milli umferða, stanslaust stuð.
Leikmenn keppast við að byggja þriggja hæða hús á lítilli eyju, sá fyrsti til að komast upp á þriðju hæð vinnur. Það hljómar svo einfallt og maður horfir á það og hugsar ” iss, þetta verður leikur einn”. Menn komast fljótlega að því að það er meira en að segja það, því þó svo að mótspilarinn hafi sama markmið getur hann sífellt verið að þvælast fyrir þér og byggja á stöðum sem að hindra það að þú getir klifrað eða klárað þína eigin turna. Spilaborðið þrengist og þrengist þangað til að einn leikmaður endar yfirleitt á toppnum.
Grunnspilið er þétt og skemtilegt en það fylgir spilastokkur sem að gefur fólki kost á að breyta spilinu og markmiðum þess talsvert ef menn vilja. Þá fá leikmenn mismunandi eiginleika eins og tildæmis að færa sig um tvo reiti í umferð í staðin fyrir einn, eða byggja tvær hæðir í umferð, það eru margir fleiri og flóknari möguleikar sem í fyrstu virðast margir smávægilegir en gera mikið fyrir leikin. Það þarf ekki að nota þessi spil en það er gott ef að fólk vill krydda upp á það.
8 ára aldursmarkið á kassanum er fínt, en það má vel kenna yngri krökkum þetta. Þetta hentar í raun öllum aldurshópum nema þeim allra yngstu.
Ingibjörg Jóna Magnúsdóttir –
Þetta er alveg ágætis afþreying. Ekki samt á topp 10 listanum, virkilega flott spil samt sem áður.
Kristinn Pálsson –
Frábært spil í anda einfaldra kænskuspila. Útlit þess gefur ekki rétta mynd af hve skemmtileg heilaleikfimi spilið er. Uppsetning þess er falleg á borði. Leikmenn keppast við að byggja upp borg og komast á topp hæstu bygginga. Hugsa þarf nokkra leiki fram í tímann og allar mögulegar útkomur. Spilið er því í anda við skák en hver aðgerð er mun einfaldari.
Leikir eru ekki of langir og því gaman að taka nokkra í röð.
Eidur S. –
Mjög hrifinn af þessu spili. Hver leikmaður er með tvo kalla staðsetta á 5×5 leikborði og er markmið leiksins að koma öðrum kallinum sínum á þriðju hæð byggingar. Þegar þú átt leik hreyfir þú annan kallinn þinn í einhvern nærliggjandi reit og ef bygging er til staðar getur þú farið upp um eina hæð. Því næst setur þú niður byggingu eða nýja hæð á einhvern nærliggjandi reit þar sem kallinn þinn er nú staðsettur. Ef andstæðingur þinn er að fara að komast upp á þriðju hæð getur þú bætt við þeirri fjórðu sem ekki er hægt að komast upp á.
Það er nóg af plássi fyrir kænsku og geta leikirnir orðið mjög spennandi. Þar sem þú ert bara með tvo kalla á borðinu, eru takmarkaðir möguleikar í boði samanborið við t.d. skák. Þetta gerir leikinn frekar fljótlegan í spilun sem ég er hrifinn af, og hægt að taka nokkra leiki í röð.
Einnig er hægt að spila með kröftum sem breyta leiknum heilmikið og þarf maður að hugsa leikinn svolítið upp á nýtt. Það eru alls 30 kraftar og sem dæmi geta sumir byggt tvær hæðir í einu, geta látið andstæðinginn skipta um pláss við sig, fjarlægt hæð úr byggingu og aðrir vinna við nýjar aðstæður eins og þegar fimm fjórðu hæðir hafa verið byggðar.
Fljótlegt og skemmtilegt spil sem auðvelt er að kenna. Mæli með.