Frábær skemmtun fyrir 2-6 leikmenn. Þú skipuleggur lestarrán með því að spila út spilum í sameiginlegan bunka með hinum leikmönnunum. Bunkanum er síðan snúið við eftir að allir hafa gert nokkrum sinnum og lestarræningjarnir hreyfa sig á spilaborðinu sem er pappalest í þrívídd. Markmiðið er að enda með sem mestan ránsfeng en einnig fær sá sem duglegastur er að plaffa hina niður auka peninga fyrir það.
Leikmenn fá lestarræningja sem allir hafa mismunandi hæfileika. Í hverri umferð skiptast menn á að spila út spilum sem segja hvað þeir ætla að gera næst. Lestarræningjarnir hreyfast þó ekki fyrr en í lok umferðar. Því má segja að þú forritir umferðina fyrirfram en hvað aðrir leikmenn gera getur haft mikil áhrif á hvernig þín umferð spilast út.
Ef þú verður fyrir skoti mun það hafa áhrif á hversu mörg spil þú færð í hverri umferð og einnig þarf að vara sig á skerfaranum sem staddur er í lestinni með skjalatösku fulla af peningum.
Inga Sigurðardóttir –
Stórskemmtilegt spil fyrir fjölskylduna, var smá flókið í byrjun en um leið og við byrjuðum að spila þá var þetta alls ekki flókið. Eitt af okkar uppáhalds spilum
Stefán Ingvar Vigfússon –
Rosalega skemmtilegt spil, leikmenn eru bandídar um borð í lest að berjast um að ná sem stærstum ránsfengnum. Þeir geta flakkað milli vagna, upp á þak, kýlt hvorn annan og skotið, en það sem gerir það sérstaklega skemmtilegt að allar hreyfingarnar og röð þeirra er ákveðin áður en hver lota hefst, þannig reynir verulega bæði á heppnina og kænsku leikmanna! Eitt af mínum uppáhalds spilum